തിരു : സഹകരണമേഖലയിൽ ആരംഭിക്കുന്ന വിമാനസർവീസായ കോ - എയറിനായുള്ള സഹകരണസംഘത്തിന്റെ റജിസ്ട്രേഷൻ നടപടികൾക്ക് തുടക്കമായി. നിർദിഷ്ട കേരള സിവിൽ ഏവിയേഷൻ ഡവല്പ്മെന്റ് കോ-ഓപ്പറേറ്റീവ് സൊസൈറ്റിയുടെ റജിസ്ട്രേഷനുവേണ്ടിയുള്ള അപേക്ഷ തിരുവനന്തപുരം അസി.റജിസ്ട്രാർ ജനറൽ ലീനലോപ്പസിന് സൊസൈറ്റിയുടെ ചീഫ് പ്രമോട്ടർ സി.എൻ വിജയകൃഷ്ണൻ സമർപ്പിച്ചു. 300 കോടി ഓഹരി മൂലധനവും 45000 കോടി ബാറോയിങ് പവറും ഉള്ള നിർദിഷ്ട സഹകരണ സംഘത്തിന്റെ ആസ്ഥാനം തിരുവനന്തപുരമാണ്. ഇന്ത്യയിൽ തന്നെ സഹകരണ മേഖലയിലെ ആദ്യത്തെ വ്യോമഗതാഗത സംരംഭമാണ് കോ എയർ. ആദ്യഘട്ടത്തിൽ‌ വിമാനങ്ങൾ വാടകയ്ക്ക് എടുത്താണ് സർവീസ് നടത്തുക. ചടങ്ങിൽ പ്രമോട്ടർമാരായ വി.ബാബുരാജ്, അഡ്വ. ബി.എ അബ്ദുൾ മുത്തലീബ് എന്നിവർ പങ്കെടുത്തു. റജിസ്ട്രേഷൻ നടപടികൾ പൂർത്തിയാകുന്ന മുറയ്ക്ക് എത്രയുംവേ​ഗം പദ്ധതിയുടെ പ്രവർത്തനങ്ങളിലേക്ക് കടക്കുമെന്ന് സി.എൻ വിജയകൃഷ്ണൻ അറിയിച്ചു.