തിരുവനന്തപുരം: കൺസ്യൂമർഫെഡിന്റെ ആഭിമുഖ്യത്തിൽ സംഘടിപ്പിക്കുന്ന 'ഓണം സഹകരണ വിപണി-2026'-ന്റെ സംസ്ഥാനതല ഉദ്ഘാടനം ഓഗസ്റ്റ് 14 വെള്ളിയാഴ്ച വൈകുന്നേരം 5.00 മണിക്ക് തിരുവനന്തപുരം സ്റ്റാച്യൂവിൽ നടക്കും. ബഹു. കേരള മുഖ്യമന്ത്രി ശ്രീ. വി.ഡി. സതീശൻ വിപണിയുടെ സംസ്ഥാനതല ഉദ്ഘാടനം നിർവ്വഹിക്കും. ചടങ്ങിൽ ബഹു. സഹകരണ എക്സൈസ് വകുപ്പ് മന്ത്രി ശ്രീ. എം. ലിജു അധ്യക്ഷത വഹിക്കും. ബഹു. ആരോഗ്യ ദേവസ്വം വകുപ്പ് മന്ത്രി ശ്രീ. കെ. മുരളീധരൻ ആദ്യ വിൽപ്പന നിർവ്വഹിക്കും. ചടങ്ങിൽ ത്രിവേണി ഇക്കോ ഫ്രണ്ട്ലി നോട്ടുബുക്കുകളുടെ ലോഞ്ചിംഗ് ബഹു. ഗതാഗത വയോജന വകുപ്പ് മന്ത്രി ശ്രീ. സി.പി. ജോൺ നിർവ്വഹിക്കും.
ഓണം പ്രമാണിച്ച് ജനങ്ങൾക്ക് ആശ്വാസവിലയിൽ അവശ്യസാധനങ്ങൾ ലഭ്യമാക്കുന്നകേരള സർക്കാരിന്റെ സബ്സിഡി സാധനങ്ങളുമായി കൺസ്യൂമർഫെഡിന്റെ സഹകരണ വിപണി ഓഗസ്റ്റ് 16 മുതൽ ഓഗസ്റ്റ് 25 വരെ സംസ്ഥാനത്ത് ഉടനീളം സഹകരണ സ്ഥാപനങ്ങളിൽ പ്രവർത്തിക്കും. നിത്യോപയോഗ സാധനങ്ങൾ വിലക്കുറവിൽ പൊതുജനങ്ങൾക്ക് ലഭ്യമാക്കുക എന്ന ലക്ഷ്യത്തോടെയാണ് ഈ പ്രത്യേക വിപണി ഒരുക്കിയിരിക്കുന്നത്. പൊതുവിപണിയിലെ വിലക്കയറ്റം തടയുന്നതിനായി 13 ഇനം അവശ്യ സാധനങ്ങളാണ് സർക്കാർ സബ്സിഡിയോടുകൂടി ഈ വിപണിയിലൂടെ വിതരണം ചെയ്യുന്നത്. ഗുണമേന്മയുള്ള ഉൽപ്പന്നങ്ങൾ ജനങ്ങളിലേക്ക് നേരിട്ടെത്തിക്കാൻ സഞ്ചരിക്കുന്ന മൊബൈൽ മാവേലി സ്റ്റോർ ശൃംഖലകളും വിപുലമായ രീതിയിൽ സജ്ജമാക്കിയിട്ടുണ്ട്. കുറഞ്ഞ നിരക്കിൽ സാധനങ്ങൾ വാങ്ങാൻ റേഷൻ കാർഡുമായി എത്തുന്ന ഉപഭോക്താക്കൾക്ക് ഈ സേവനം പ്രയോജനപ്പെടുത്താം.
