തിരുവനന്തപുരം: സഹകരണ സംഘങ്ങളുടെ യഥാർത്ഥ ആവശ്യങ്ങൾക്കനുസരിച്ച് പ്ലാൻ ഫണ്ട് പദ്ധതികൾക്ക് പുതിയ രൂപം നൽകുന്നു. കാലഹരണപ്പെട്ടതും പ്രായോഗികതലത്തിൽ വേണ്ടത്ര ഫലപ്രദമല്ലാത്തതുമായ നിലവിലെ പദ്ധതികൾ പുനഃപരിശോധിച്ച് 2027–28 സാമ്പത്തിക വർഷത്തേക്കുള്ള പദ്ധതികൾ പുതുക്കി രൂപീകരിക്കാനാണ് സഹകരണ വകുപ്പിന്റെ നീക്കം.
13 വിഭാഗം സഹകരണ സംഘങ്ങൾക്കായി നിലവിലുള്ള വിവിധ പ്ലാൻ പദ്ധതികളിലാണ് പ്രധാനമായും മാറ്റം വരുത്തുന്നത്. ഇതുവരെ ഏതാനും സഹകരണ വകുപ്പ് ഉദ്യോഗസ്ഥർ കേന്ദ്രീകരിച്ച് പദ്ധതികൾ തയ്യാറാക്കുന്ന രീതിയായിരുന്നു. എന്നാൽ, സംഘങ്ങളുടെ യഥാർത്ഥ ആവശ്യങ്ങളും പ്രായോഗിക ബുദ്ധിമുട്ടുകളും വേണ്ടത്ര പ്രതിഫലിക്കാത്തതിനാൽ പദ്ധതികൾക്കായി സമർപ്പിക്കുന്ന നിരവധി അപേക്ഷകൾ നടപടിക്രമങ്ങളുടെയും മറ്റ് കാരണങ്ങളുടെയും പേരിൽ നിരസിക്കപ്പെടുന്ന സാഹചര്യമുണ്ടായിരുന്നു.
ഈ സ്ഥിതിക്ക് മാറ്റം വരുത്തുന്നതിനാണ് സഹകരണ വകുപ്പ് മന്ത്രി മുന്നോട്ടുവച്ച പുതിയ സമീപനം. മന്ത്രിയുടെ നിർദ്ദേശാനുസരണം സഹകാരികളെയും സഹകരണ വകുപ്പ് ഉദ്യോഗസ്ഥരെയും ഒരുമിച്ച് പങ്കെടുപ്പിച്ച് തിരുവനന്തപുരം RCS ഓഫീസിൽ രണ്ട് ദിവസത്തെ വികസന സെമിനാർ സംഘടിപ്പിച്ചു.
സഹകാരികൾക്ക് പറയാനുള്ളത് കേട്ടു
പ്ലാൻ ഫണ്ട് പദ്ധതികളുടെ രൂപീകരണത്തിൽ ആദ്യമായി കൂടുതൽ പ്രാധാന്യം നൽകിയത് സഹകാരികളുടെ നേരിട്ടുള്ള അഭിപ്രായങ്ങൾക്കാണ്. നിലവിലുള്ള പദ്ധതികളിൽ അപേക്ഷ സമർപ്പിക്കുന്നതിനുള്ള സങ്കീർണ്ണമായ നടപടിക്രമങ്ങളും വിവിധ ഘട്ടങ്ങളിലുള്ള അനുമതികളും സഹകാരികൾ സെമിനാറിൽ ചൂണ്ടിക്കാട്ടി.
അതേസമയം, മാറിയ കാലഘട്ടത്തിനും സഹകരണ സംഘങ്ങളുടെ ഇന്നത്തെ ആവശ്യങ്ങൾക്കും അനുയോജ്യമായ നിരവധി പുതിയ പദ്ധതികളും സഹകാരികൾ മുന്നോട്ടുവച്ചു.
സംഘങ്ങളുടെ ആവശ്യങ്ങൾ മനസ്സിലാക്കി, അവ നടപ്പാക്കാൻ കഴിയുന്ന രീതിയിൽ പദ്ധതികൾ രൂപീകരിക്കുക എന്നതാണ് പുതിയ സമീപനത്തിന്റെ പ്രധാന പ്രത്യേകത.
വകയിരുത്തിയ ഫണ്ട് തന്നെ പൂർണമായി വിനിയോഗിക്കപ്പെടുന്നില്ല
പ്ലാൻ ഫണ്ടായി ബജറ്റിൽ വകയിരുത്തുന്ന തുകയുടെ മുഴുവൻ ഭാഗവും നിലവിൽ വിനിയോഗിക്കപ്പെടാത്ത സാഹചര്യമുണ്ട്. പദ്ധതികൾക്ക് അപേക്ഷ നൽകുന്നതിനുള്ള നടപടിക്രമങ്ങളുടെ സങ്കീർണ്ണതയും മാനദണ്ഡങ്ങളുടെ കാഠിന്യവും ഉൾപ്പെടെയുള്ള കാരണങ്ങളാൽ പല സഹകരണ സംഘങ്ങളും പദ്ധതികൾക്കായി അപേക്ഷ സമർപ്പിക്കുന്നതിൽ നിന്ന് പിന്നോട്ടുപോകുന്നുണ്ട്.
ഇതിന്റെ ഫലമായി വകയിരുത്തിയ തുകയുടെ വിനിയോഗം കുറയുകയും, സഹകരണ മേഖലയ്ക്കായി ലഭ്യമാക്കുന്ന സർക്കാർ ഫണ്ട് പൂർണമായി പ്രയോജനപ്പെടുത്താൻ കഴിയാതിരിക്കുകയും ചെയ്യുന്ന സ്ഥിതിയാണ് നിലവിലുള്ളത്.
2027–28 മുതൽ പുതിയ പദ്ധതികൾ*
ഈ സാഹചര്യത്തിലാണ് കാലാനുസൃതവും പ്രായോഗികവുമായ പുതിയ പദ്ധതികൾക്ക് രൂപം നൽകുന്നത്. വികസന സെമിനാറിൽ ഉയർന്നുവന്ന നിർദ്ദേശങ്ങൾ പരിശോധിച്ച്, സഹകരണ സംഘങ്ങളുടെ വികസനത്തിനും ആധുനികവൽക്കരണത്തിനും നേരിട്ട് പ്രയോജനപ്പെടുന്ന പദ്ധതികൾ 2027–28 മുതൽ നടപ്പാക്കുന്നതിനാണ് ലക്ഷ്യമിടുന്നത്.
സഹകാരികളുടെ ആവശ്യങ്ങൾ സഹകാരികൾ തന്നെ മുന്നോട്ടുവയ്ക്കുകയും, അവയുടെ പ്രായോഗികത സഹകരണ വകുപ്പ് ഉദ്യോഗസ്ഥരുമായി ചേർന്ന് പരിശോധിക്കുകയും ചെയ്യുന്ന പുതിയ രീതിയിലൂടെ പ്ലാൻ ഫണ്ട് പദ്ധതികളുടെ രൂപീകരണത്തിൽ തന്നെ ഒരു മാറ്റത്തിനാണ് തുടക്കമാകുന്നത്.
പദ്ധതികളുടെ എണ്ണം വർധിപ്പിക്കുന്നതിനേക്കാൾ സംഘങ്ങൾക്ക് യഥാർത്ഥത്തിൽ പ്രയോജനപ്പെടുന്ന പദ്ധതികൾ, ലളിതമായ നടപടിക്രമങ്ങൾ, ഫലപ്രദമായ ഫണ്ട് വിനിയോഗം എന്നിവയ്ക്കായിരിക്കും പുതിയ സമീപനത്തിൽ ഊന്നൽ നൽകുക.
സഹകരണ സംഘങ്ങളുടെ വളർച്ചയും സാമ്പത്തിക ശക്തീകരണവും ലക്ഷ്യമിട്ട് നടപ്പാക്കുന്ന ഈ പദ്ധതികൾ സംസ്ഥാനത്തെ സഹകരണ മേഖലയുടെ വികസനത്തിന് പുതിയ ദിശാബോധം നൽകുമെന്നാണ് പ്രതീക്ഷിക്കുന്നത്.
