തിരുവനന്തപുരം: സംസ്ഥാനത്തെ സഹകരണ മേഖലയ്ക്കായി സമഗ്രമായ സഹകരണ നയം രൂപീകരിക്കുന്നതിനുള്ള ചർച്ചകൾ അടുത്തമാസം ആരംഭിക്കുമെന്ന് സഹകരണ മന്ത്രി എം. ലിജു അറിയിച്ചു. സഹകരണ മേഖലയിലെ വിവിധ യൂണിയനുകളുമായും സഹകാരികളുമായും ജീവനക്കാരുടെ സംഘടനകളുമായും ബന്ധപ്പെട്ടവരുമായും വിശദമായ ചർച്ചകൾ നടത്തിയായിരിക്കും നയം രൂപീകരിക്കുക.
സഹകരണ മേഖല നേരിടുന്ന നിലവിലെ വെല്ലുവിളികൾ, സഹകരണ സംഘങ്ങളുടെ പ്രവർത്തനങ്ങൾ കൂടുതൽ കാര്യക്ഷമമാക്കൽ, അംഗങ്ങളുടെയും നിക്ഷേപകരുടെയും താൽപര്യസംരക്ഷണം, യുവാക്കളെ സഹകരണ മേഖലയിലേക്ക് കൂടുതൽ ആകർഷിക്കൽ തുടങ്ങിയ വിഷയങ്ങൾ ചർച്ചകളിൽ പ്രധാനമായും പരിഗണിക്കും.
സംസ്ഥാനത്തെ സഹകരണ പ്രസ്ഥാനത്തെ കൂടുതൽ ശക്തവും ജനകീയവുമാക്കുന്നതിനും കാലാനുസൃതമായ മാറ്റങ്ങൾ ഉൾക്കൊള്ളുന്നതിനുമുള്ള നിർദേശങ്ങൾ വിവിധ തലങ്ങളിൽ നിന്ന് സ്വീകരിക്കുമെന്നും മന്ത്രി വ്യക്തമാക്കി.
സഹകാരികളുടെയും ജീവനക്കാരുടെയും സംഘടനകളുടെയും അഭിപ്രായങ്ങൾ പരിഗണിച്ച് എല്ലാവരുടെയും പങ്കാളിത്തത്തോടെയുള്ള സഹകരണ നയത്തിനാണ് സർക്കാർ ലക്ഷ്യമിടുന്നതെന്നും എം. ലിജു പറഞ്ഞു.
